ភ្នំពេញ៖ អ្នកនាំពាក្យសាលារាជធានីភ្នំពេញលោក ម៉ែត មាសភក្ដី បានឱ្យដឹងថា មានប្រជាពលរដ្ឋ និងភ្ញៀវទេសចរណ៍ជាតិ-អន្តរជាតិ សរុបប្រមាណ ៧ម៉ឺននាក់ បានជួបជុំគ្នាចេញធ្វើដំណើរកំសាន្តតាមទីកន្លែងផ្សេងៗដូចជា រមណីយដ្ឋាន សារមន្ទីរ សួនកំសាន្ត សួនច្បារសាធារណៈ និងទីកន្លែងកំសាន្តឯកជនក្នុងរាជធានីភ្នំពេញ។
លោកក៏បានឱ្យដឹងផងដែរថា បើទោះបីជាមានមនុស្សច្រើនបែបនេះក្ដីក៏ពលរដ្ឋហាក់បានជ្រួតជ្រាបនូវវិធានការសុវត្ថិភាពជាចំាបាច់បានយ៉ាងល្អ។
លោកថា បើទោះជាតាមការសង្កេតឃើញថា ដោយស្ថានភាពការជួបជុំគ្នាច្រើនក្នុងពេលតែមួយកន្លែងតែមួយ ដែលនាំអោយបងប្អូនមួយចំនួនមិនអាចរក្សាគម្លាតក៏ពិតមែន ប៉ុន្តែបងប្អូនសឹងតែគ្រប់ៗគ្នាបានពាក់ម៉ាស់ មានការប្រើប្រាស់ជេល ឬអាល់កុលបានខ្ជាប់ខ្ជួន។
កាលពីថ្ងៃទី១ ខែវិច្ឆិកា ឆ្នាំ២០២១ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានជំរុញដល់ពលរដ្ឋឱ្យចេញដើរកម្សាន្តក្នុងឱកាសឈប់សម្រាកបុណ្យអុំទូក បន្ទាប់ពីកម្ពុជាបានបង្កើនភាពស៊ាំទៅនឹងជំងឺកូវីដ-១៩កាន់តែល្អប្រសើរ និងទទួលបានលទ្ធផលវិជ្ជមានក្រោយសាកល្បងឱ្យពលរដ្ឋចេញដើរក្នុងថ្ងៃបុណ្យភ្ជុំកាលពីដើមខែតុលា៕
